佇西元1907年左右番薯寮廳施行的移民政策，為著鼓勵少年人搬厝去檨仔跤開墾，開出足濟好處予，講較好聽是疏開人口為的生活設想，實際上是利用開墾山區慢慢仔搶走南鄒族的土地，予隘勇線更加深入山內底。
一開始每戶攏會當領著一百khoo當作起厝kah買農作物的資金，實施的初幾冬農作物收成誠差，無法度養飼一家口仔人，就會去做隘勇勤務，勤務內容就是巡查隘勇線，建立新的隘勇線，每月向番薯寮廳領四、五khoo的薪水，加減補貼厝內開銷。
番薯寮廳的官員想講若無法度維持新移民的生活按呢真緊就會搬走，代誌就大條啊！所以將日本寄來的種栽佇番薯寮苗圃發新栽，將梅仔樹、梨仔樹、葡萄提去檨仔腳種作，想袂到這寡果子樹會當適應遮的天氣生長誠好，收成袂䆀，後來新住民生活漸漸穩定落來，番薯寮廳也做到將隘勇線往山內底推捒，對日本政府有交代，原底蹛佇遮的原住民幹焦會當繼續往山內面行去，毋願意搬厝的就漸漸予人同化。
這馬的檨仔跤也是以農作物為主要生產，親像檨仔、梅子、野菜等等……最近在推捒一日旅行是一款結合在地的文化kah物產的觀光活動。
